Түркістан облысы аумағында аса қауіпті зиянкестермен күрес шаралары биыл да жүйелі түрде жалғасады. Бұл мәселе облыс әкімінің орынбасары Нұрбол Тұрашбеков төрағалық еткен мәжілісте кезекті рет қаралды.
Жиында шегірткеге қарсы өңдеу жұмыстарын ұйымдастыру және үйлестіру мақсатында құрылған штаб құрамының облыс әкімінің өкімімен бекітілгені айтылды. Фитосанитарлық диагностика және болжамдар әдістемелік орталығы жүргізген зерттеулер нәтижесінде ықтимал ошақтар анықталып, аумақ 65 секторға бөлінген. Сонымен қатар үйірлі шегірткелердің күбіршелеріне салыстырмалы талдау жүргізілді.
Облыстық аумақтық инспекция басшысы Нұрбол Бекмұратов фитосанитариялық іс-шаралар жүргізу қағидасына енгізілген өзгерістерді баяндады. Жаңартылған талаптарға сәйкес, жер үсті бүріккіштердің күндік нормасы төмендетіліп, жұмылдырылатын техника саны арттырылған. Ал қолданылатын химиялық препараттардың тиімділігі 95 пайыз деңгейінде бекітілген.
Мәжіліс барысында облыс әкімінің орынбасары жөндеуді қажет ететін техникаларды қалпына келтіру жұмыстарын жеделдетуді тапсырды.
– Талдау нәтижесінде бірқатар ошақта күбіршелер саны азайғаны байқалады. Дегенмен, бұл жаңа ошақтардың пайда болу қаупін жоққа шығармайды. Барлық дайындық жұмыстары наурыз айына дейін толық аяқталуы тиіс. Химиялық препараттардың сапасы өңдеу басталғанға дейін тексеруден өтіп келуін қатаң қадағалаңыздар, – деді Нұрбол Тұрашбеков.
Айта кетейік, 2025 жылы өңірде үйірлі шегірткеге қарсы күреске 341 техника мен 3 мыңға жуық маман жұмылдырылып, 715,3 мың гектар алқап өңделген.
Биыл тәжірибе ретінде 8 ауданда 446 ошақты аумақта жер аудару тәсілі енгізілмек. Бұл әдіс зиянкестердің таралуын шектеуге және ауыл шаруашылығы алқаптарын сақтауға бағытталған.
Өңірде фитосанитариялық қауіпсіздікті қамтамасыз ету және ауыл шаруашылығы өнімдерінің өнімділігін арттыру мақсатындағы жұмыстар тұрақты бақылауда болады.
